شهيد على جبين الوطن ....................بقلم / الشاعر محمد عبد القادر
شهيد على جبين الوطن
لما الرصاص قال للمطر
ها قوم بدورك يامطر
قال الشهيد ....
إحمينى يابا من الخطر
إبعد كلاب الصهاينه
عن ضى القمر
شايف يابويا بعينى
قبرى بيتحفر
إحمينى يابا وضمنى
إبنك انا وبتحبنى
خلفتنى وفرحت بيا وشلتنى
احمينى يابا من الخطر
الأب ....
أحميك بعمرى ياضى عمرى
ومطلبى طخونى انا
وسيبوا الصبى
صراخى ضايع فى الفضا
صوت الرصاص قتل الرجا
طخونى انا وسيبوا الصبى
قال الشهيد ....
خلاص يابويا ماتحمنيش
أسكت يابويا ماتتعبنيش
أوصيك يابويا بالوطن
ومافيش تنازل عن دا الأمل
وما تتنازلش عن دمنا
دا حقنا ودا حلمنا
أنا رايح لرب العلا
رب الحق وربى أنا
وحق الخير والجمال
رايح لرب بيرحم الاطفال
بعيد عن نار الكلاب
ودم ورصاص وعذاب
خلاص يابويا ماتحمنيش
خلاص يابويا مش راح أعيش
خلاص يابويا ماتبعدنيش
رايح يابويا للمسيح
يمكن اداوى هناك جريح
رايح لخاتم المرسلين
رايح لكل المنزلين
رايح مع طفل الحجر
رايح لمن ماتوا ف بحر البقر
ومات الولد بتطخوا مين
مات الولد ياملعونين
فى الصبح مين يضحك لمين
مات الولد بتطخوا مين
فى كل شرع وكل دين
يحرم رصاص المجرمين
ياحرام رصاص الغدر صاب الطيبين
فين المجالس فين الامين
مات الولد بتطخوا مين
هوا ده طبع الجبان طول السنين
هوه ده طبع الصهاينه الملعونين
ضرب الرصاص على ولادنا الصغيرين
خلاص بقى ضاع الضنا
ومين يقول القدس لنا
محمد عبد القادر
0
التعليقات
